کانشی رام کا مجسمہ توڑے جانے سے دلت سماج میں بے چینی ، علاقے میں کشیدگی

چندی گڑھ : ۳۱؍مئی: (ایجنسی) ہریانہ کے گڑگاؤں میں کانشی رام کے مجمسہ کو توڑنے کا معاملہ سامنے آیا ہے ۔ یہ مجسمہ سیکٹر -4 کے امبیڈکر نگر میں لگا تھا ، جسے کچھ شرپسندوں نے گرا دیا ۔ کانشی رام کو بی ایس پی کے بانی کے طور پر جانا جاتا ہے ۔ یہ واقعہ پیر کی دوپہر تقریبا تین بجے پیش آیا ۔دلت سماج کے لوگوں میں اس واقعہ کو لے کر کافی غصہ ہے ۔ امبیڈکر سماج کی تنظیم کے لوگوں نے دھمکی دی ہے اگر جلد سے جلد مجرموں کو نہیں پکڑا گیا ، تو وہ لوگ پورے ہریانہ میں دھرنا مظاہرہ کریں گے۔  ساتھ ہی ساتھ ان لوگوں نے سیکٹر -5 کے تھانے کا گھیراؤ بھی کیا ۔سیکٹر میں لگے سی سی ٹی وی کیمروں میں مجسمہ



توڑتے ہوئے کچھ لوگوں کی فوٹیج ملی ہے تاہم اب تک ان لوگوں کی شناخت نہیں ہو پائی ہے ۔ فوٹیج میں واضح  طور پر دیکھا جا سکتا ہے کس طرح کچھ لوگ کانشی رام کے مجسمہ کو ہتھوڑا مار کر توڑ رہے ہیں ۔سیکٹر -4 میں نصب کانشی رام کے مجسمہ کے ساتھ بابا صاحب بھیم راؤ امبیڈکر اور بھگوان بودھ کے بھی مجسمے لگے ہوئے ہیں ۔ تاہم ان کو کوئی نقصان نہیں پہنچا ہے ۔ شر پسندوں نے صرف کانشی رام کے ہی مجسمہ کو نقصان پہنچایا ہے ۔کہا جا رہا ہے کہ کچھ لوگ وہاں کانشی رام کا مجسمہ لگائے جانے کے حق میں نہیں تھے ۔ لوگوں نے اس کی مخالفت بھی کی تھی ۔  امبیڈکر سماج کے لوگوں کو شک ہے کہ شاید انہی لوگوں نے اس واقعہ کو انجام دیا ہو ۔